櫪木闖大阪搵着數

猪拉多纳

飛腳雙星缺陣例死火

日乙名牌球隊大阪飛腳如願坐上一哥之位，不過隊內兩位日本國腳遠藤保仁同今野泰幸嚟緊整個六月都會缺陣，今年三月曾經出現類似情況，當時飛腳兩戰都贏唔到，足見呢兩位仁兄對球隊有幾重要。飛腳今輪主場對櫪木SC，主勝熱而不穩，蘇豪博「讓球客勝」！

（周六下午3時開賽）

大阪飛腳今季降落日乙，日本國腳遠藤保仁同今野泰幸有情有義冇離隊，但由於日乙同國家隊賽期撞到應，佢哋整個六月份都要為國效命，兩位「大佬」上周各建一功成為贏波功臣，今輪雙雙缺陣，大軍戰鬥力起碼打個八折。查實遠藤同今野都試過喺三月代表國家隊缺席飛腳兩場賽事，結果飛腳兩戰皆和，真係有辦你睇。

飛腳教頭長谷川健太賽前刻意淡化兩位國腳缺陣嘅不利因素，強調可以調整戰術，不過遠藤保仁係球隊進攻核心，踢法有如巴塞嘅沙維，替補人選武井擇也或明神智和都唔可以發揮相同作用，冇咗呢個發電機都幾難搞。櫪木SC外援基斯坦奴達施華同沙比亞等人都有份量，佢哋近五次作客贏四場，表現好鬼硬淨，有條件搶分，受讓之下當然捧「讓球客勝」。
綠茵褪熱求「愛」反彈

同日東京綠茵主場對FC愛媛，綠茵係典型「主強客弱」球隊，佢哋今季曾於主場戰勝升班熱門神戶勝利船，戰鬥力超勁，老牌前鋒高原直泰今季五個士哥有四球喺自己地頭建功，屬正宗門口狗。

綠茵經過連續三場作客不勝後，依家已經褪晒熱，今次對住客場蟲愛媛已屆贏波反彈之時，小讓平半盤口合理，呢場可試上盤。