馬來之珍轉出生機

猪拉多纳

　　事有湊巧，真係唔可以唔信邪，好似上周中夜賽，兩匹補出馬同時贏晒，問你服未？更加唔到我哋唔服，就係韋十二，全晚1場頭馬贏唔到，居然做到騎師王，套用足球術語，呢啲正宗贏波輸盤！但今期開始冇咗佢，馬世界可能即刻「立立亂」，大家小心睇路。

　　第二場四班1800米。「馬來之珍」初出明明力撼「友誼大使」，後駒四班已獲兩勝一位，「馬來之珍」冇可能到目前未出頭！搏傷咗咩？上場又唔會上番名，到底咩原因令匹馬成就冇突破？

　　或者係路程性能正在轉變中，多跑1600米開始唔啱。今次嘗試加程角逐，夠唔夠長力，真係未跑唔會知，但總好過留在1600米冇轉機。

　　第五場四班1200米。「信是有緣」馬名好聽，但初出唔會有幾多馬友同佢有緣，臨場十倍過外嘛，但陣上表現生龍活虎，末段衝勢極之出色，睇嚟插四班好鬼超。呢類質新馬汲取經驗之後，又有足夠時間操磨，再出進度隨時大幅度升級，有力補中。

　　第六場四班1400米。「喜多盈」初出走勢嚇人一跳，唔係受阻可能有位置，再出成績退步，原因可能與負重磅有關，今次依然頂磅出戰，唔係冇擔心過，考慮到有過1場適應，只要稍為在負重能力上進步小小，對住呢批對手，應該綽綽有餘。