美德鬥攻 華府吹大風

猪拉多纳

奇哥倒戈 打場好波

今晚國際熱身賽戲碼分量十足，美德雙雄7年來首度交鋒，比賽於美國首都華盛頓羅拔‧甘迺迪紀念體育場上演，而今場看點就係前德國領隊「奇哥」奇連士文首次帶領美國隊倒戈，重逢現任德國領隊嘅昔日戰友勒夫，兩人合作於06世界盃帶領德國隊取得季軍，共通點都係崇尚進攻足球，今晚老友聚頭，當然要打番場入球多嘅好波賀賀佢，1.72倍入球大係投X首選。

（無綫翡翠台周一凌晨2時30分直播）
靠丹普西杜里孭飛

美國隊近期喺國際賽嘅攻擊力一直受到批評，加上佢哋嚟緊周六早上開始，18日內要應付3場重要嘅世界盃外圍賽，令人懷疑今場會否Hea踢？不過「奇哥」對德國隊嘅深厚感情會令佢加倍重視今仗，亦正因為傳媒不斷質疑佢哋嘅攻力，啱啱喺上周四早上對比利時嘅熱身賽已經放開懷抱同對手鬥攻，雖然輸2比4，但面對正在起飛嘅比利時都入到兩球，又唔算太差。

美國今仗人腳不整，大將當路雲雖然經過4個月養傷後已歸隊，但目前身體狀況，相信好難正選登場，最慘仲係防線，一對擔任右閘嘅德甲兵捷雲度奴同贊特拿都因傷缺陣，要由級數差得遠嘅奧格斯堡守將柏靴斯特頂上，防線難免出現缺口。不過美國攻力確有改善，箭頭艾迪杜里今季喺荷甲阿爾克馬爾踢到曉飛，全季入咗31球，而新任隊長熱刺嘅丹普西亦承擔起進攻重任，今晚喺主場當然同德國對攻啦！
高路斯歸隊火力增

德國今次可謂殘陣訪美，啱啱贏咗厄瓜多爾4比2，普多斯基9秒閃電入波，但比賽頭20分鐘狂數一輪後就Hea踢，尤其防線喺梅迪薩卡帶領下漏洞百出，若非門將艾達出色，厄瓜多爾肯定唔只入2球，今場球隊有高路斯、施雲賓達同哥斯基奧斯踢完意盃同歐聯歸隊，攻力提升。

不過勒夫立心試陣，今仗會收起2號門神艾達，畀兩名年輕門將薛拿同達史特根各踢半場，其餘位置亦會玩大輪換，對賽果唔算重視，球隊踢完今仗就放暑假，相信一班甚少有機會代表國家隊嘅新人會盡情「騷哥利」，無壓力下同美國合演入波騷。