英格蘭大傷鋒焗守 頂到巴西半場

猪拉多纳

巴西足球聖殿馬拉簡拿球場正式重開，主人家巴西搵來歐洲名牌國家隊英格蘭拍跳，英軍出現嚴重傷兵潮，前線更係重災區，只傷剩朗尼同禾確特，肯定乏力搶攻爭勝，只求唔好大敗，勢必死守，預期半場少士哥，揀「半場細」！

（周一凌晨3時開賽）

英格蘭上場熱身賽對住愛爾蘭，老帥鶴臣用番442陣式進攻發揮極曳，大軍慘被國內傳媒狠批，士氣極差。最大鑊係爆發傷兵潮，先有中鋒安祖卡路爾因傷退隊，上場史杜列治傷出，今場賽前再有韋碧克傷膝，阿歷士張伯倫亦整親小腿，另一箭頭迪科爾則未好番晒，前線得番朗尼同禾確特，前者喺曼聯雪到冇態，要禾確特孤軍作戰，料難有作為。

今場係巴西足球聖地馬拉簡拿球場重開嘅首戰，賽前爆出球場未有安全證書嘅醜聞，失禮死人，巴西為挽面子，當然會打真軍爭勝。巴西前線射手尼馬同侯克都極具卡士，預期佢哋會強攻對手。不過，巴西慣用地面組織推進，踢法較為迂迴，對住英軍鐵桶陣要畀啲耐性，睇怕上半場唔會出現大手成交，捧半場細好合理。