拜仁勝在有軒歷基斯

猪拉多纳

歐洲各大錦標都名花有主，暑期大型賽事要等到六月中開打嘅洲際國家盃，Peter趁有空檔同大家分享吓今屆歐聯決賽。奪標熱門拜仁慕尼黑喺比賽初段其實有多少患得患失，可能近年成日攞亞軍，球員未能夠放低包袱所致，加上多蒙特嘅壓迫性打法好奏效，搞到拜仁咬佢唔入。但經過中場休息之後，拜仁表現有大幅改善，老帥軒歷基斯巧妙調配成為奪標關鍵。

軒歷基斯係一個好聰明嘅教頭，下半場叫洛賓唔好企死喺右邊，要求佢四圍走唔好畀多蒙特班球員箝制，另外幾位進攻球員比如列貝利及湯馬士梅拿就盡量走位配合，結果洛賓一傳一射搞掂多蒙特，拜仁亦成為今季歐洲王者。Peter翻睇過呢場頂級決賽唔只一次，以搵出現代足球嘅精髓，當中有幾個要點好值得大家留意，首先係防守，Peter都已經多次提到防守嘅重要性，尤其係一場過嘅決賽，你永遠唔失波，永遠都有機會奪標。第二點係軒歷基斯知人善用，我知道好多人都彈洛賓係敗家仔，經常喺大賽浪費機會，但軒帥懂得運用好球員，令佢變成捧盃英雄。
高普確有大將之風

第三點想講吓多蒙特教練高普，呢位有料之人以全場緊迫踢法，帶領球隊打入歐聯決賽，就算輸畀老對手拜仁，高普亦稱讚對手實至名歸。高普真正做到「識得贏識得輸」，好有大將之風。最後Peter想講「波係圓嘅！」鬥到決賽冇話邊隊強邊隊弱，只要你踢出好波，總有機會笑到最後。
金句：歐聯決賽啟示錄，嗒多幾次好過睇現場節目