加納客戰照搶蘇丹

猪拉多纳

今晚受注賽事以世界盃外圍賽做主打，阿King睇中一場非洲區D組賽事，對上兩屆都能躋身決賽周嘅加納作客撲擊蘇丹，由於此圈每組只有一個出線席位，所以每場比賽都唔可以掉以輕心，加納無論人腳、經驗及近況均遠勝對手，1.65倍客W係全日重心。

（周六凌晨1時開賽）

此階段為非洲區外圍賽第二圈，四十支球隊分成十組，每組只有首名可以進身下一圈，加納目前喺D組排第二，暫以一分落後贊比亞，面對頭三輪全敗兼冇入波嘅蘇丹再冇失分空間。雖然大家較熟悉嘅艾辛、阿休兄弟今次冇入選加納大軍，但祖雲達斯中場卡華禾艾沙姆、AC米蘭中場蒙達利、隊長前鋒基恩依然分量十足，上次交手蘇丹作客淨吞加納四蛋，就算今次返回主場都幫唔到幾多。
黑山主弱寧捧烏克蘭

另外兩關揀歐洲區賽事，G組波斯尼亞作客拉脫維亞，波斯尼亞五戰四勝一和愈戰愈勇，為保榜首唔會揸流攤，捧1.47倍客W。最後H組黑山主場鬥烏克蘭，黑山現時雖然力壓英格蘭排首名，但佢哋向來唔擅主攻，今屆外圍賽主場對住波蘭、英格蘭都失分，烏克蘭打反擊仲有利，烏軍受讓捧下盤。