守勢波發圍 法國最「巴」閉

猪拉多纳

足球王國沒落遇強冇計

今晚又有重量級熱身賽上演，世界排名再創新低嘅巴西喺主場對法國，吼實2.55倍「讓球客勝」。據統計過去3年巴西面對頂級強隊，只得3勝6和7負勝率唔夠19%，既然法國上場收起賓施馬留力，搏殺格當然抵捧！

（中央5台周一凌晨3:00直播）
巴西近3年「大戰」勝率冇19%

森巴兵團沒落，佢哋近3年對世界頂級強隊，竟然得3勝6和7負，教頭換完又換都救唔番，即使安排02年領軍奪得世盃冠軍嘅史高拉利重新上任，對住英格蘭都係得1和1負，硬撼意大利只不過踢成2:2，證明巴西已經徹底失去球壇王者氣派，讓波當然要唔過。

更弊嘅係，唔計南美經典賽對阿根廷雙方唔夫添，新球王尼馬加入國家隊後，對住強隊幾乎例牌冇貨賣，只係入過德國1球咁大把，最近佢由山度士轉投巴塞，傾人工、趕簽約、去魯營做Show，難免分散作戰專注力，捧唔過！

睇番依家巴西陣容，後防似乎仲有星味過前線，大家知啦，法國向來係玩守起家，而且鍾意打反擊，作客可以踢守勢波，簡直係食正佢哋條水，就算皇馬中堅華拉尼因傷冇入選，至少仲有成班喺英超搵食嘅後防猛將可以用，對住牙齒印勁深嘅森巴兵團唔會輕易投降。
法國列貝利冇歸隊都掂

或者大家覺得，列貝利為拜仁創造3冠王歷史後，冇歸隊始終拖低法國火力，但唔好忘記，法國教頭迪甘斯喺日前以0:1不敵烏拉圭嘅熱身賽，專登收起賓施馬留力，擺明係想向世仇巴西踩多腳，最近佢哋兩次對住西班牙，都不過每場失1球，今場應該頂得住唔使輸。
巴西連開5場雙

巴西近7場有6場開入球大、1場開入球細。

巴西連續5場開入球雙。

巴西近5場未試過半場落後，2次領先、3次打和。

法國連續4場半場不失。
巴西火力弱捧半場細

法國足球強調防守，好少一開波就搶攻，連續4場半場保持清白，兼且開晒半場細絕對唔係撞彩。今晚作客巴西，正路法國都係踢守勢波。既然巴西近期火力普通，完半場前的確好有機會冇交收，咁講法1.45倍半場細當然玩得過啦，嫌熱都可以要嚟過關嘛！