墨西哥細破哥斯達黎加

猪拉多纳

世界盃中北美洲區外圍賽，墨西哥主場硬撼榜首哥斯達黎加，高手過招預計入波唔多，波童首選細盤。另外美國主場迎戰巴拿馬則勝望甚濃，可取較高回報嘅「讓球主勝」。

中北美洲區頭三名可直接出線決賽周，第四名則要同大洋洲區首名球隊踢附加賽，目前哥斯達黎加、美國及墨西哥同得七分，哥達斯黎加領先第五位嘅洪都拉斯只有三分，一場勝負足以改寫整個局面，故此每場賽事對爭取出線都非常關鍵。

先講墨西哥主場鬥哥斯達黎加，墨西哥比哥斯達黎加、美國多踢一場，實際失分雖較多，不過佢哋勝在防守穩，係分組賽中失波最少嘅隊，對手想贏佢哋唔易。哥斯達黎加目前能和兩大傳統勁旅並駕齊驅，當然亦唔係符碌，効力富咸嘅拜仁雷斯及緬恩斯嘅祖利亞戴亞斯均具級數，唯一隱憂係佢哋作客表現冇主場咁穩定。以墨西哥今屆保守演出，就算贏波都好大機會一球起、兩球止，捧細盤最穩陣。

（周三早上8時開賽）

美國夠料數巴拿馬
至於美國主場鬥巴拿馬，美國今次冇選當路雲，前線靠AZ射手艾迪杜里及熱刺中場丹普西數胡，攻力仍有保證，巴拿馬今屆外圍賽四戰雖然未輸過，不過作客未必可以踢番同樣水準，美國有力淨勝兩粒。

（周三早上9時30分開賽）