愛爾蘭爆退隊潮 狂牛兵攞威炒得起！

猪拉多纳

「狂牛兵團」撞散哀兵！西班牙同愛爾蘭今晚會喺美國紐約合演一場國際熱身賽，咁啱愛爾蘭賽前迎來騎呢退隊潮，實力進一步削弱，兼且「狂牛兵團」上場對海地只係贏得2:1咁失威，今次相信會精銳盡出務求大勝一場挽回面子，為嚟緊嘅洲際國家盃壯行色，當然熱捧1.67倍「讓主」啦！

（開賽時間：周三早上8:00）

面對世界盃兼兩屆歐國盃得主西班牙，相信愛爾蘭領隊查帕東尼本身都冇諗過會有奇迹出現，踢番場「爭氣波」當練吓兵已經唔錯啦！點知一班球員出發去美國前夕先至爆發退隊潮，原因仲要千奇百怪，奧沙因為叔叔過世要留喺祖家處理喪事，艾登麥基迪同沙恩朗分別要同女友拉埋天窗都算情有可原，不過格連韋倫就話球季太長要抖抖，李察鄧尼更加係因為要「搵新工」所以唔踢，成班友擺明冇心為國效命，士氣又點會好吖？加埋約拿芬禾達斯同荷拉漢等傷兵，冇咗9成主力，今場點同西班牙鬥先？

格連韋倫想抖 李察鄧尼要搵工
相反西班牙就因為國家隊競爭太激烈，獲徵召已經係無上光榮，當然唔會有咁嘅情況啦，更何況佢哋上仗對海地派出桑馬達等高質副選，居然只係小勝2:1有多少失威，今戰肯定想大勝一場騷番啲王者本色！

再者「狂牛兵團」踢完呢場就要出發去巴西踢洲際國家盃，班國腳為咗爭取出場機會肯定搏甩髀，今季頻受傷患困優嘅沙維、正選位置唔穩陣嘅大衞施華等如果發威，愛爾蘭呢班哀兵肯定頂唔住。唔好忘記西班牙近11場已經贏足9場，上次輸波更要追溯至2011年嘅11月，個勢咁勁，愛爾蘭今鋪睇怕難逃吞蛋厄運咯！