小狂牛超班再發神「威」

猪拉多纳

U21歐國盃進入4強階段，今晚頭場有衞冕嘅西班牙同挪威爭入決賽，「小狂牛」小組3戰全勝兼零失球，盡顯王者本色，對住實力平平嘅挪威絕對有力延續強勢炒起對手，捧1.85倍「讓主」！

（now633及635台周六晚11:30直播）

西班牙上輪怒炒荷蘭3蛋，真係嚇咗小妹一驚！除咗艾斯高同埋堤亞高艾簡達拿嘅表現超班，控制晒成條中場線外，以3球領先射手榜嘅皇馬小將艾華路莫拉達，門前把握力亦都異常出眾，家陣成班球員愈夾愈熟，又使咩驚冇士哥？

雖然挪威同意大利同樣有6球進帳，但其中3球同埋球隊唯一一場勝仗，都係嚟自極為不濟嘅英格蘭，加埋挪威3戰分組賽都有失波，反映防線根本唔穩陣，面對西班牙輸少粒都當贏喇！