美國哥斯達黎加串W

猪拉多纳

榜首雙雄搶分放甩墨西哥

世界盃外圍賽中北美洲區，由於墨西哥正身處巴西參加洲際國家盃，美國、哥斯達黎加周三早上只要喺主場贏波便可鞏固出線優勢，對手洪都拉斯、巴拿馬同屬不擅作客球隊，美、哥兩場主W皆可放心捧場。

先講美國主場鬥洪都拉斯，美國今屆外圍賽唯一敗仗就係首輪作客不敵洪都拉斯，不過球隊之後表現轉趨穩定，四輪比賽取得三勝一和，現以兩分領先多踢一場嘅宿敵墨西哥，只要今場贏波，便可將榜首優勢擴大至五分，出線機會高唱入雲。

洪都拉斯五戰積七分仍有出線機會，可惜佢哋作客經常腳軟，今屆外圍賽已先後輸畀巴拿馬及哥斯達黎加，作客形勢處下風。美國早前喺熱身賽擊敗德國後信心大增，接連兩場外圍賽全取六分，前鋒艾迪杜里腳風大順，就算缺少當路雲都冇有怕，主W穩開。

（周三早上9時開賽）
洪都拉斯巴拿馬客戰腳軟

另一場哥斯達黎加主場鬥巴拿馬，哥斯達黎加跟墨西哥同得八分，但少踢一場，今場贏波同樣可以放甩對手。哥斯達黎加第四圈兩場主場外圍賽全勝兼冇失波，表現可靠。巴拿馬上輪作客美國淨吞兩蛋，今次遇上同樣級數嘅哥軍注定冇運行，捧主W。

（周三早上10時開賽）