崔帥聽執包袱 南韓冇得「伊」

猪拉多纳

韓迷唔Like 寧換甘馬曹

世盃外圍賽亞洲區「10強賽」今晚進行終極大戰，南韓喺蔚山主場對伊朗，吼實1.59倍「讓球客勝」好過。今場好可能係南韓教頭崔康熙離隊前最後一場比賽，由於佢堅持棄用外流主力，賽前又辣火頭鬧伊朗球員，激嬲對方隨時自己攞嚟衰。

（now671及672台、廣東體育周二晚8:00直播）
決賽周傳換外籍教頭揸旗

現時A組嘅南韓、伊朗同烏茲別克，同樣至少可以踢附加賽，當中以榜首嘅南韓形勢最好，今場和波已夠數出線決賽周。不過咁，其實南韓足總已經好唔滿意教頭崔康熙，聽講只要完成出線任務，佢就會即刻回歸全北汽車，費事畀韓國傳媒同球迷日鬧夜鬧，啲韓國網民仲寸到話寧願同中國隊交換，用甘馬曹去頂崔康熙喎，事實南韓已經傳緊會請外籍新教頭領軍出戰明年世盃。

崔康熙得唔到足總同球迷支持，主要係佢同外流主力傾唔埋，甚至連原本嘅隊長朴主永都夠膽死棄用，今次更加連中場寄誠庸、具滋哲同中堅李正秀都冇歸隊，郭泰輝又有傷，主要得翼鋒李青龍肯為佢搏命，感覺好似變成冇牙老虎。
和伊朗夠出線搞定慶祝會

雖則南韓和波都夠數，但係韓國足總計劃好搞慶功會，慶祝國家隊連續8次打入決賽周，仲請埋人氣組合「Secret」同「Children of Empire」表演，擺明就係唔衰得，難怪崔康熙失晒控話一定要贏，咁嘅情況，淨係靠新星孫弘民好難o趙得低伊朗。

最攞命係，南韓早兩日捉到個扮攝記潛入訓練場嘅伊朗技術分析員，大家反晒面，崔康熙仲話到明同伊朗有牙齒印，覺得對方踢茅波又冇品，情願打沉對方同烏茲別克攜手出線喎。不過呢番說話，就激到伊朗教頭奎雷斯紮紮跳，鬧佢侮辱伊朗國民，仲話要畀啲顏色南韓睇。要知道伊朗中場索查効力奧沙辛拿，隊長尼古納姆曾經係佢同球會嘅隊友，又有標準列治射手高贊尼查特負責數胡，主力卡士明顯較高，受讓撐得過。
出線形勢：

南韓：至少可踢附加賽，今仗唔輸即出線，輸波加上烏茲別克贏波計得失球。

伊朗：至少可踢附加賽，贏波肯定出線；和波加上烏茲別克贏波則計得失球；輸波但烏茲別克贏唔到亦可出線。

烏茲別克：至少可踢附加賽，贏波之餘要伊朗輸波才可出線；若贏波同時伊朗和波，要計得失球。

卡塔爾、黎巴嫩：肯定出局。
交手連開10場細

雙方連續10次對賽開入球細。

南韓連續7屆躋身決賽周。

伊朗分組賽7戰僅失2球。

伊朗近9次交手得3勝6和，對上1次輸波係05年。
足智彩撐和波冷敲2:2、3:3

南韓喺世盃外亞洲區「10強賽」對伊朗，和波已經夠數出線，雖然南韓教頭崔康熙猛話要打沉對方，但足智彩似乎當佢發噏風，和波低開2.35倍，即係話操盤手都覺得，和波機會好大。如果大家覺得「讓球客勝」得1.59倍冇肉食，2:2同3:3波膽分別有15倍同50倍，值得以小博大o架！

亞洲區A組