意大利煲日式魚生粥

猪拉多纳

派路 腦殘入晒局

洲際國家盃A組意大利今晚會遇上日本，意大利首仗憑「腦殘」巴洛迪利入波以2:1擊敗墨西哥，目前手執3分，只要今晚再贏日本，出線高唱入雲。相反，次一班嘅日本被東道主巴西技術性擊倒後，出線路難行，不過經歷首場洗禮，相信再大敗嘅機會唔高，而且意大利成日煲魚生粥，揀3.15倍「讓球和」就啱數喇！

（無綫明珠台及高清翡翠台、中央5台周四早上6:00直播）
柏蘭迪利埋怨少一日休息

以老帶新嘅意大利上仗贏墨西哥其實幾合理，大部分時間控制戰局，前線22歲嘅「腦殘」有水準演出，不時引到對手粗野犯規，最後射入致勝一球顯示出佢嘅力量及爭勝心，成熟咗唔少。後生仔交足貨，34歲嘅中場老大哥派路亦不遑多讓，一記靚絕罰球先開紀錄，並且喺中場控制得宜，絕對有心有力，呢一老一嫩完全入晒局，今晚嘅表現對戰果舉足輕重。縱然主帥柏蘭迪利埋怨，日本比佢哋多一日時間休息，但相信實際影響唔會太大。
沙哲朗尼呻上場得5成水準

今仗日本陣中有兩位熟悉意大利嘅探子可以提供線報，分別係意籍主帥沙哲朗尼同効力國際米蘭嘅左閘長友佑都，相信對部署有一定幫助。正如沙哲朗尼喺首仗賽後所講，球隊經過長征後只係發揮出5成水準，「張峰」認為擁有香川真司同本田圭佑嘅日本，同對手實際差距唔係咁大，香川賽前亦咬牙切齒話要全取3分，鬥志非常鮮明，今場只要發揮番應有實力，相信有力同意大利一戰，唔會重複一面倒大敗情景。

洲際盃A組
意大利2013旺開雙

‧日本近8戰全數開出「半場細」。

‧意大利2013年7戰6次開「入球雙」。

‧兩軍過往3次對賽，意大利取得2勝1和。
藍武士死火熱捧「半細」

日本首戰落敗後，要保住出線一絲希望，今場肯定以擊敗意大利為目標。不過「藍武士」上場進攻表現疲弱，近8場又全數開「半場細」，況且意大利手執3分今場亦唔會太過冒進取攻，雖然「半場細」得1.27倍熱就熱啲，但係密食當三番嘛！
洲際盃賽制

現為分組賽階段，8隊分2組，每組4隊進行單循環比賽，每組首、次名進身4強。