狂牛數爆大溪地

猪拉多纳

副選上陣盡情進攻

「冇骨魚腩」大溪地又嚟喇！今晚洲際國家盃B組次輪賽事，身兼世盃及歐國盃盟主西班牙出戰大洋洲代表大溪地，後者上仗慘遭尼日利亞大炒六個一皮，咁大舊魚腩撻喺面前，一班「狂牛」梗係撳住搶喇，主帥迪保斯基會大輪換，一班後備如費蘭度托利斯、桑馬達、辛迪卡索拉難得出場仲唔搏盡咩，大細中位數調至6.5球，斯維照捧大盤。

（無綫翡翠台、明珠台、高清翡翠台周五凌晨3時直播）

首次參加國際大賽嘅大溪地，喺B組第一場對尼日利亞就「一鳴驚人」，被對手大炒6比1，作為一支弱旅，大溪地覺得今次有幸能與勁旅過招，係難得嘅學習機會，因此佢哋並冇擺出鐵桶陣，落後時更冇氣餒奮力反撲，精神可嘉，令所有球迷動容。不過，從比賽角度睇，大溪地呢種唔理輸贏、盡情享受比賽嘅態度，成為該隊係咁失波嘅重要源頭，若果繼續咁嘅「快樂踢法」，最開心嘅應該係佢哋對手。
費托桑馬達磨刀霍霍

西班牙主帥迪保斯基今屆放棄無鋒陣，希望增強攻力，雖然首仗擊敗烏拉圭，但佢哋喺兩球領先之後，不斷失機而為人詬病，搞到迪帥勁冇癮，有傳佢打算今仗只留用沙治奧拉莫斯，其餘十個位置全部換晒，即係話喺後備席蠢蠢欲動嘅查維馬天尼斯、桑馬達、辛迪卡索拉及費托有表演機會，呢班喺球會雷打不動嘅主力，返到國家隊經常畀「巴塞系」食住，依家難得擔正，仲唔入多幾粒氹迪帥，一場大屠殺亦好難避免，入球大走唔甩。