大溪地受讓6球 頂住狂牛

猪拉多纳

洲際盃「天與地」之戰今晚爆發！世界盃冠軍西班牙嘅實力喺當今世界球壇堪稱頂級，佢哋今晚會喺洲際盃B組出戰實力最弱嘅大溪地，雖然兩隊一個天一個地，但小妹認為以「狂牛軍團」嘅大賽作風，唔會咁狠心炒對手十個一皮，今場佢哋出副選之餘仲要讓足6球，「讓客」有4.2倍當然抵捧啦！

（無綫翡翠台、明珠台及高清翡翠台、中央5台周五凌晨3:00直播）
網友惡搞叫西班牙蒙眼踢

大溪地喺首輪分組賽對尼日利亞破蛋後，開心到好似贏咗波嘅畫面顯示出佢哋係為咗享受足球而嚟，嗰種快樂令小妹都深受感動。可惜比賽始終係比賽，大溪地對住尼日利亞都慘敗1:6，就知呢支大部分由業餘兵組成嘅球隊，實力同其他列強根本無法相提並論，呢支大洋洲代表近7戰輸足6場，其中仲要有5場吞蛋添，難怪網上有人惡搞話國際足協批准「狂牛軍團」今場蒙住眼嚟踢，都有人信以為真啦！

好彩嘅係今場對手西班牙喺大賽嘅作風從來唔求大炒，除咗上屆歐國盃決賽大勝意大利4:0之外，佢哋無論喺2010年世盃定去年嘅歐國盃，都未試過以超過2球之差炒起對手，今場對住差咁多班嘅大溪地，照計同樣會「見好就收」。
沙維休息副選加操

況且「狂牛軍團」今場好可能會畀沙維、恩尼斯達等正選抖抖，西班牙傳媒指大軍抵達里約熱內盧備戰今仗後，領隊迪保斯基特別對捷西斯拿華斯、查維馬天尼斯、桑馬達同費蘭度托利斯等副選「加操」，雖然牌面仍然係世界級，但論配合程度一定唔及一班以巴塞兵為核心嘅正選球員，想以6球之差大炒對手，真係難啲喇！
鬥牛兵7戰半場不敗

大溪地近7戰輸6場，共失18球，其中5戰至少失2球。

今次係大溪地首次參與洲際國家盃。

西班牙近7戰得6勝1和，並未試過喺半場落後。

西班牙近10戰未試過喺半場領先超過3球。
西班牙副選未夾熟捧「半細」

西班牙今仗派出全副選上陣，雖然質素仍然屬頂級，不過喺開賽初段肯定需要多啲時間去磨合，加上成班波未必會去得太盡，半場入球中位數開到3.5球，當然捧2.58倍嘅「半場細」啦！