尼日利亞 烏拉圭 駁火演入球騷

猪拉多纳

聽朝洲際國家盃B組會由尼日利亞火併烏拉圭，由於同組有弱旅大溪地，所以呢組形勢比較簡單，如無意外今場係雙方出線關鍵一戰。「超霸鷹」首場大勝，但防線存有唔少漏洞，今晚面對卡雲尼、蘇亞雷斯兩位世界級前鋒，好難唔失波喎！況且雙方踢法同樣攻優於守，一於捧2.1倍入球大。（無綫明珠台、高清翡翠台及中央5台周五早上6:00直播）

尼日利亞雖然首場以6:1怒炒大溪地，不過唔知係對手太弱，抑或係受到賽前獎金風波影響心態，從精神面貌所見，中後場部分球員心神恍惚，中前場踢起上嚟就求求其其，多次單刀埋門都失諸交臂，認真唔要得。其實呢隊「超霸鷹」平均年齡好後生，有機會參加大型賽事應該要好好把握，表現好啲畀大球會睇中，身價隨時三級跳，咁咪仲實際，睇嚟陣中大師兄約翰米基爾，應該要好好提醒班後輩先得。
兩隊同樣攻優於守

首仗僅負西班牙1:2嘅烏拉圭，表現亦唔算理想，全場處於被動，只能憑「哨牙蘇」蘇亞雷斯完場前罰球妙射破蛋。形勢上今場有焗攻味道，上仗被封殺嘅一對箭頭卡雲尼同蘇亞雷斯，對住防守漏洞多多嘅尼日利亞防線，係時候「騷哥利」，再者又有老將科蘭可隨時上陣搏殺，火力絕對唔嘢小。另外，一對中路守將高甸同盧根奴上場演出麻麻，能否抵禦「超霸鷹」嘅快速反擊亦係勝負關鍵。綜合雙方攻強守弱嘅風格，一定多波入。