弗爆球王 遠勝巴神

猪拉多纳

洲際盃重頭戲爆發！今晚A組賽事有東道主巴西迎戰意大利，爭奪小組首名，呢場波唔單止係兩大紅人尼馬同巴洛迪利交鋒，仲係94年世盃決賽翻版添！「張峰」唔係誇張，尼馬比起當年嘅羅馬里奧更全面，仲冇咁懶添；相反，巴洛迪利取代巴治奧做「新巴神」，論技術同心理質素，「腦殘」梗係差幾班啦！唔使諗，一於博2.4倍「讓主」，撐巴西全勝出線！

（無綫翡翠台及高清翡翠台、中央5台周日凌晨3:00直播）

想當年94世盃決賽，巴西同意大利雖然冇入波，但過程精彩萬分，呢場波更加令「張峰」愛上足球、踏上足球路，所以我對呢兩隊都好有情意結o架！時隔19年，巴西仍然大踢進攻足球，由當年嘅羅馬里奧換上尼馬擔大旗，拍檔則由白必圖變成費特或者祖奧，鋒力一樣咁堅！
「新球王」全面過「獨狼」

數據唔會呃人，巴西兩場分組賽入咗5球兼零失球，尼馬真係最大功臣！「新比利」之前經常被批評淨係識喺Youtube威，不過佢就用表現向網民作出反擊，連續兩場射入世界波打破缺口，上仗仲憑個人技術製造靚助攻，比起「獨狼」羅馬里奧，尼馬唔單止唔「獨」，仲好識配合隊友添，對住時有甩漏嘅意大利防線，「新球王」隨時如入無人之境！由隊長堤亞高施華孭飛嘅防線則保持零失球，滴水不漏，個勢咁好，巴西當然想食住上，爭首名出線避開西班牙啦！
派路打柴 迪羅斯停賽

意大利上仗以4:3反勝日本，係就係好睇，但亦見到佢哋班守將勁唔掂，「94最強防線」英名盡喪，若果日本唔係3次中柱中楣，「藍衫軍」隨時輸埋都仲得！有睇波嘅朋友，都見到意大利全場被日本壓住嚟踢，「巴神」已經唔係巴治奧，而係忽龍忽蟲嘅巴洛迪利，最大鑊係「藍衫軍」今仗仲有中場雙核派路同迪羅斯分別因傷同停賽唔踢得，面對實力高過日本幾班嘅巴西，分分鐘輸鑊甘！
森巴兵近7仗至少隊兩粒

巴西近8戰未嘗一敗，其中7場至少攻入2球。

意大利近7戰亦有6仗最少入2粒。

巴西近8戰有6場開出入球大，意大利則連續3場開大。