英格蘭U20拉雜成軍難「克」敵

猪拉多纳

大賽撐下盤，已成街頭智慧，誰不知剛啱完結嘅U21歐國盃，以及仲踢緊嘅洲際盃就一反常態，西班牙U21連場大勝捧盃；洲際盃就更得人驚，頭8場分組賽7度開大，全部開上盤。至於U20世青盃，歐洲球隊近10屆只得1次封王，其餘就由南美及非洲兵壟斷，但首日頭3隊出場嘅歐洲兵全勝，4場波亦有3場開上盤兼全數開大，完全係打破傳統。
伊拉克有5名大國腳

不過今晚出場嘅英格蘭U20，就唔似有條件擊敗伊拉克，前者近兩屆世青盃成績勁差，6場不勝兼只入得1球，歸根究柢係英格蘭過往喺分齡賽只着重U21代表隊，U20只係選賣剩蔗，就以今屆為例，21人大軍之中有英超經驗嘅實在唔多，只有愛華頓中場巴克里同埋紐卡素新星比堅尼馬拿出場次數較多，唔似有條件贏有5名大國腳在陣嘅伊拉克，撐2.28倍「讓客」。

（TVB網絡電視01頻道、now801台周一凌晨2:00直播）

足球重心：伊拉克U20（讓球客勝）、烏拉圭U20（勝）