小狂牛超班撞散加納U20

猪拉多纳

巴塞「妖人」迪路菲奧孭飛

近年橫掃國際球壇各項錦標嘅西班牙，今晚會有U20小將喺世青盃A組鬥加納，以「小狂牛」嘅實力要大炒加納唔係難事，小妹睇好呢支有蘇索同埋迪路菲奧壓陣嘅勁旅輕取「黑星」加納，當然捧1.88倍「讓主」啦！

（TVB網絡電視01頻道及now801台周二凌晨2:00直播）

講到今屆世青盃，西班牙陣中最受注目嘅一定係巴塞「妖人」迪路菲奧啦，雖然佢喺一隊上陣機會暫時唔多，但名氣已經頗大，上仗梅開二度更充分顯示身價，難怪多蒙特、華倫西亞同西維爾等球隊都排住隊搶人啦！至於利物浦新星蘇索上仗負責中場輸送，更被讚許有沙比阿朗素嘅風範，有佢組織攻勢，迪路菲奧同埋上場省兩粒嘅謝斯洛迪古斯呢對合作多時嘅拍檔，自然如魚得水，要延續近4戰至少入3粒嘅強勢，唔係難事。
「黑星」只係識攻防線開窿

無可否認，前屆冠軍加納嘅身體質素肯定比「小狂牛」優勝，問題係技術就肯定有所不及喇，佢哋早前喺非青賽面對埃及同馬里等弱旅都只可以喺法定時間內打成平手，加埋由上仗對法國嚟睇，加納雖然出乎意料咁大踢進攻足球，但就搞到防線穿大窿，仲喺下半場連失3球，今次對住同樣主攻但明顯高一班嘅西班牙，分分鐘輸得仲甘呀！

世青盃A組
世青盃賽制

現為分組賽階段，24隊分6組，每組4隊進行單循環比賽，每組首、次名，以及4支最佳小組第3名將進身16強。