皇者拍檔換配件搏

猪拉多纳

　　尚有5期賽事，今個馬季就要收爐，閣下今季有冇盈餘？抑或賭落輸多少？無論係贏係輸，記住抱着平常心，正如阿棟一向格言，賽馬係玩樂性質，切記量力而為，視為娛樂活動最好，自己負擔得起一個數額，咪睇住嗰個額嚟玩，贏就當獎勵，輸咗咪當惠澤社群。

　　第二場四班1000米。一向唔多鍾意「歷山傳奇」，因為佢臨情經常標汗，脾氣又唔好，陣中跑姿唔靚更加不在話下。不過，今次加眼罩，又排了2檔，真係乜都夾啱晒，難得潘頓肯騎，似係想交代，若果跑出比前仗略高水準，其實已經夠贏。

　　第七場三班1200米。「皇者拍檔」唔好計大前仗田草的話，最近3場谷草賽事均有出色表現，前仗更後上入Q，而嗰場係第1次加脷帶。呢次加眼罩出賽，方嘉柏向來唔會隨便亂用配件，忽然轉一轉，應該係有幫助至會咁做，希望對能力有所提升。當然，呢匹後上馬發揮得好與壞，必須視乎賽事環境，如果C欄有得追，贏面相對增大。

　　喜勁駒上仗犀利

　　第八場三班1650米。「喜勁駒」上年年尾跑完，延至五月再出，腳有事冇法子，焗住冇得跑，之但係，近仗成績大有進步，證明健康冇晒事。

　　以「喜勁駒」上場末段力迫頭馬「幸運金龍」嘅走勢，又確係好犀利，今仗只要保持到，呢批馬唔會係佢手腳。