烏拉圭洩怨氣 「大利」入球騒

猪拉多纳

洲際國家盃今晚到咗尾聲，打頭陣有烏拉圭對意大利嘅季軍戰。兩隊喺4強都輸得唔抵，烏拉圭有12碼宴客兼完場前失波落敗。意大利仲慘，上半場可置西班牙於死地嘅機會起碼有5個，但全部失諸交臂，最後互射12碼落敗。大賽季軍戰隊伍壓力向來唔大，可以踢得更放，自然多波入，一於追1.8倍入球大。

（無綫翡翠台、明珠台、高清翡翠台及中央5台周一凌晨0:00直播）
烏拉圭今屆鋪鋪開大

烏拉圭上仗4強面對東道主巴西，表現一啲都唔曳，上半場科蘭12碼宴客未能先開紀錄成為勝負轉捩點，最終以1:2落敗。前線三叉戟科蘭、蘇亞雷斯同卡雲尼全部交足功課，多次令巴西門前風聲鶴唳，運氣好少少，點只入一粒吖。雖然烏拉圭用盡方法阻止巴西進攻（包括超技術），但係都要失兩粒，可見防守力認真麻麻，佢哋今屆場場有入波兼開大，絕對有利上演「大」騷。
意大利主攻趁機練兵

意大利係就係射輸12碼，再次喺大賽不敵西班牙，惟戰情不如上年歐國盃決賽咁一面倒，意大利將防守反擊戰術發揮得淋漓盡致，多次3、4腳傳送就到達「狂牛軍團」心臟地帶，縱使把握唔到，但相信對球員日後再遇西班牙嘅心理上有極大幫助。烏拉圭組織力遠遠不及西班牙，意大利應該會好似分組賽咁採取主動，絕唔會龜縮到踢穩守突擊，尤其領隊柏蘭迪利正致力改善藍衫軍主攻能力，佢已放風會收起大部分有傷嘅主力，擺明會趁季軍戰好好練兵。
烏拉圭連續6場入波

兩軍近5次交手，當中4次半場波膽係0:0。

烏拉圭連續6場比賽有波入。

意大利近8場比賽只曾一敗。