紅鑽 櫻花新星「大」激鬥

猪拉多纳

日聯盃8強次回合

日聯盃8強次回合「大」戰今日上演，浦和紅鑽喺主場再遇大阪櫻花，入球大最抵博。首回合紅鑽射手原口元氣因為紀律問題被雪藏，今場復出肯定搏盡，咁啱櫻花新王牌柿谷曜一朗要入波慶祝入國家隊，新星對撼「大」戰可期！

（開賽時間：周日下午5:00）
原口元氣練波嘈交博洗底

首回合紅鑽以2:0領先，但其實佢哋陣中嘅首席射手原口元氣，因為操練期間同隊友嘈交冇份踢。經過1個星期思過，同埋喺練習賽梅開二度證明實力，相信原口元氣會諗辦法入波為自己洗底，贏番教練同隊友信任，況且首回合連入兩球嘅前鋒興梠慎三，操練整親後證實只係虛驚一場，傷勢唔嚴重，更加有利開大。

另邊廂，櫻花嘅柿谷曜一朗紀律仲衰過原口，佢試過因為操練成日遲到被放逐去日乙，今季佢生性大爆發，據講已入選日本國家隊嘅東亞錦標賽大軍，仲被東瀛球迷當正係國家隊未來希望。正所謂能力愈大責任愈大，柿谷曜一朗睇見櫻花落後兩球，絕對唔會扮隱形，有佢同原口元氣鬥入波，1.62倍入球大易絲執。
首回合：紅鑽客勝2:0

日聯盃賽制：

採主客兩回合制，今輪為8強次回合。如兩回合計打和，計算作客入球優惠，未分勝負則在次回合法定時間後加時30分鐘，加時階段亦計作客入球，再和則互射12碼決勝。