葡萄牙加納鬥攻大晒冷

猪拉多纳

今晚續演四場世青盃十六強賽事，其中葡萄牙Ｕ20硬撼加納Ｕ20。今屆葡軍有前冇後打死罷就，誓要用「性感足球」贏民心，不過加納亦非善男信女，鬥攻格局入波必多，大盤冇甩拖。

（TVB網絡電視01頻道及now 801周三晚11時直播）

「小葡兵」出征世青盃之前，曾經歷八場不勝而飽受批評，主帥艾格波格斯決定唔再畏首畏尾，改踢有前冇後嘅「性感足球」，又畀佢收到奇效，充分激活球隊嘅攻擊力，三場分組賽狂轟十粒為各隊之冠，當中腳風超順嘅布馬以五球殺上射手榜一哥，連拍檔阿拿迪治都有三粒進帳，火力爆晒燈。對手「小黑星」加納上仗喺許勝不許和情況之下，大炒美國四個一皮得以躋身16強，前鋒艾舒夫亞亦重拾射門鞋，依家士氣正盛，唔怕同「小葡兵」駁火，入球大有1.72倍值博。