美國卡士勁勢炒危地馬拉

猪拉多纳

美國聽朝喺熱身賽主場迎戰危地馬拉，領隊奇連士文今次點兵雖屬B隊，惟實力仍遠高於對手，同時作為出戰美洲金盃前最後閱兵，認真程度亦足夠，實力鬥心俱備，1.8倍「-1」「讓主」係不二之選。

（開賽時間：周六早上11:00）
花旗兵有當路雲壓陣

丹普西、米高巴特利等熟口熟面嘅花旗兵都冇入選，但陣中仍有經驗豐富嘅當路雲、比士利同安恩胡壓場。「奇哥」喺賽前講明，今場會畀足機會所有球員，換句話講即係上位好時機，麥恩亞尼、迪斯基路特呢班生牯仔當然會自動波去盡。

嚟緊美洲金盃冇份踢嘅危地馬拉，近三場熱身賽主場約戰哥倫比亞、阿根廷同伯利茲，面對前兩者大敗情有可原，但連世界排名第129位嘅伯利茲都搞唔掂，足證佢哋有幾「魚腩」，加上馬高柏巴、洛利加等核心球員冇入選，今場聽炒！