白蘭斯要攞威撐PSG食「茨」

猪拉多纳

歐洲聯賽收咧冇耐，話咁快又開始有熱身賽，格拉茨今晚對巴黎聖日耳門唔似爆得出。首先聖日耳門由新教練白蘭斯領軍，去到奧地利集訓頭炮當然唔想衰，其次PSG有好多主力未歸隊，有份踢嘅球員會搏命爭取表現避免入雪櫃，2.4倍「讓球客勝」抵捧。

（開賽時間：周三凌晨0:00）
格拉茨新兵未夾熟

格拉茨今季有馬里博爾前鋒羅拔比歷、哈化柏林前鋒馬高杜歷施同中場比捷拿加盟，弊在借用嘅凱沙羅頓射手蘇古達柏素上季中途已經走人，新兵未夾熟感覺好難爆冷。特別係聖日耳門教練白蘭斯新官上任肯定要威，就算包括射手伊巴謙莫域同前鋒拿維斯未歸隊，中場盧卡斯洛迪古斯、中堅堤亞高施華踢完洲際國家盃放緊假都唔怕。

雖然唔係最強人腳，但其實PSG仲有好多星級球員壓陣，例如前鋒文尼斯、中場柏斯托尼、莫達同中堅阿歷士洛里高全部都係國腳級，特別係呢班波仲傾緊增兵，假如今戰有份披甲嘅球員唔想成季坐冷板，點都要畀啲料新帥白蘭斯睇吓，就算熱身賽未必砌到盡，贏兩球都係最低消費啦！