法國翻嗒殘陣加納

猪拉多纳

另一場準決賽，法國Ｕ20與加納Ｕ20繼分組賽後再次碰頭，法國對上兩圈大勝對手晉級固然愈戰愈勇，加上加納今仗有三名主力需要坐波監，戰鬥力大受影響，相信法國可繼分組賽後再贏多鋪，穩陣啲可捧1.44倍主W，上盤讓半一亦可一試。

（無綫明珠台及now 801周三晚11時直播）

兩軍今屆曾在首輪分組賽碰頭，當時法國贏對手三比一，之後法國雖然兩場分組賽都贏唔到、屈居西班牙之後以次名出線，但踏入淘汰賽後演出鋒芒畢露，先後大勝東道主土耳其及烏茲別克進身四強，無論個人質素、經驗或隊形都畀人超班感覺。

加納不敵法國後唔單止冇被打沉，反而一鼓作氣連贏美國、葡萄牙及智利殺入四強，信心及狀態比起上次交手時肯定有進步，但波童認為咁樣只能拉近彼此距離，並不足以令加納報番一箭之仇。
加納後防失支柱

加納上場能夠淘汰智利勝在有體力，論技術及整體意識佢哋唔算好，而且加納今屆賽事場場有失波，最慘今仗仲有三名主力因為累積黃牌要停賽，其中隊長羅倫斯拉迪及艾譚馬都係後防支柱，更加令防線雪上加霜，上場對智利射入靚波先開紀錄嘅中場奧迪積缺陣，亦對中場組織有影響，好難喺狀態托弗嘅法國身上攞甜頭。