哥斯達黎加 蝦忠直阿伯

猪拉多纳

除世青盃決賽之外，近期最矚目賽事非美洲金盃莫屬，聽朝C組賽事哥斯達黎加強勢撲擊伯利茲，後者上仗拒絕引誘打假波，咁有骨氣值得一讚，可惜呢班波實力太曳，完全有洲際盃個陣係咁帶畀人歡樂嘅大溪地feel，哥斯達黎加大炒一場冇難度，「讓球主勝」咪錯過。

（有線61及201台周日早上6時直播）
伯利茲係冇骨魚腩

雖然上仗1比6慘敗畀美國，賽後傳媒大爆有人用1萬歐元賄賂莫財嘅伯利茲造假，但該隊球員揚言為國家而戰斷言拒絕，非常正氣。不過話分兩頭，唔造假都輸到大大鑊，首度參賽嘅伯利茲有幾多料大家心照喇，隨時好似洲際盃時嘅「冇骨魚腩」大溪地，中門大開任人魚肉。哥斯達黎加嘅實力喺中美洲數一數二，喺挪超搵食嘅進攻中場巴蘭迪斯上仗大勝古巴之役仲省兩粒添，睇得出隊波狀態幾弗，面對防線猶如豆腐渣嘅伯利茲，勢必撳住嚟搶，「讓球主客和」哥軍讓到兩球擺明備受看好，強捧「讓球主勝」。
:莫迪回勇追擊維京

講開挪超，上季盟主莫迪已逐漸走出季初嘅低迷，喺尼日利亞射手捷馬帶領下，近八場正式賽事未輸過，當中主場更錄得四連勝，相反對手維京四戰不勝跌入谷底，作客對住回勇嘅莫迪恐難全身而退，主勝捧得過。最後巴甲邦迪比達主場對住巴希亞，前者近期唔識在主場踢波，喺自己地頭連輸四場，咁鬼反常，巴希亞有得受讓不妨一試。