三神見底難敵心跳

猪拉多纳

剛過去周中有啲歐霸盃外圍賽，出現9比0同7比2呢類大比數賽果，真係亂晒龍！冇計o架，嗰啲國家冇監管，自然有人大膽喺度搵食，肥叔見到呢啲賽事都冇眼睇，連班專業嘅大戶都完全唔掂。作為投X人士，有權選擇買乜波，冇必要玩呢類賽事。講番今次重心，日職賽事清水心跳主場對大分三神，捧主勝！

（周六下午5時開賽）
資源有限行家睇淡

肥叔成日都同大家講，亞洲波一定玩日職，南韓國家隊發展係唔錯，但國內聯賽烏煙瘴氣，好多莊家都唔敢開，就算開盤都要限住客仔單場投X額，避免畀人收到內幕料煲爆。日職今季大部分球隊實力平均，大分三神算係比較弱嗰隊，呢班波資源有限，計人腳只得日乙級數，季前唔少行家都唔睇好佢哋可以護級成功。三神實力見底，作客唔叻，今次對住心跳都係凶多吉少！

跟住再睇挪威波，北歐聯賽好多都有問題，但挪超同瑞典超發展一樣咁好，起碼制度健全，鮮有出現負面新聞，呢點非常重要。挪威名牌球隊莫迪主場對維京，莫迪有個星級教頭蘇斯克查帶隊，佢哋季初陷入低潮，成績差到冇人有，不過，經過一輪調整後，家陣已經重上正軌，呢隊波根本係挪超頂級球隊，只要回復水準，仲有大把上升空間，可以繼續跟進，呢場可捧主隊。