美國「幸運W」射爆哥斯達黎加

猪拉多纳

唔少球員都好迷信，好似美國前鋒雲度路斯基咁，係都要印多隻「W」字喺波衫度，結果又真係入球停不了喎，佢聽朝對哥斯達黎加隨時又嚟料，呢場美洲金盃C組分組賽一於撐美國，簡簡單單要個1.68倍主W。

（有線61及201周三早上8:00直播）

事緣美國球衣職員誤將雲度路斯基個名「Wondolowski」印成「Wondowlowski」，點知多咗隻「W」嘅佢就喺首戰鬥伯利茲大演帽子戲法，於是佢就索性要求印隻「W」字喺波衫上面，結果上仗鬥古巴又省兩粒，呢隻「幸運W」認真唔講得笑。加上美國領隊奇連士文話今仗係佢哋喺今屆金盃首個真正考驗，照計排陣上唔會太揸流。

同美國一齊入咗8強嘅哥斯達黎加，上仗對住隊魚腩伯利茲都只係贏得1:0，但考慮到佢哋已經704分鐘冇失波，相信輸都唔會輸得太肉酸，嫌主W冇肉食可要埋3.45倍「讓和」。