兵工廠做「大」騷氹阿粉

猪拉多纳

雲格訪越南 兒時願望成真

阿仙奴今晚會同越南踢熱身賽，原來今次唔單止係兵工廠首次去呢個東南亞國家，更加係第一間英超球會造訪越南，領隊雲格仲表示「細細個已經希望到訪越南」，咁識氹Fans，相信佢哋會學似上場炒印尼明星隊咁整番場入球Show，省靚招牌騷吓哥利，今場入球大細中位數3.5球，1.62倍「入球大」都要捧。

（亞視本港台周三晚8:00直播）
越南領隊：「希望輸得少過印尼」

主帥雲格賽前賣口乖大讚越南呢個地方，認為今次之行「完成自己個人心願」，仲講明會打場好波畀越南球迷睇，相信班球員聽到都會識做。上仗因患流感缺陣嘅中場韋舒亞今晚復出，呢位球員除咗好波之外，次次落場都交足功課，有佢喺中場串連組織，配合一班開晒齋嘅射手基奧特、普多斯基、禾確特，要入多幾球唔難吖。

講真，越南嘅「優勢」得番主場之利，連領隊黃文福都自嘲「希望輸得少過印尼」。不過睇到當地球迷對兵工廠咁熱情，你話佢哋隨時掉轉槍頭幫阿仙奴打氣有咩咁出奇。雖然越南都有國家隊主力中場阮明方、前鋒黎公榮等星級球員壓陣，不過同阿仙奴始終係兩個世界，與其死守悶親球迷，不如搏入番一、兩球，齊齊開「大」Party開心吓好過。