袋鼠兵惡過鬼

猪拉多纳

尹佩斯未谷起 紅魔冇氣勢

曼聯亞洲之旅第二站去到澳洲，今日會喺悉尼決戰澳職明星隊，「紅魔鬼」有王牌射手尹佩斯復出助拳，又被捧成一面倒熱門，但大家要記住今場只係熱身賽，勝負一啲都唔重要，曼聯讓得多靠唔住！呢班「袋鼠兵」由名將艾馬頓做隊長，仲有中場米拿倒戈，有心藉地利降「魔」攞彩，博「讓球主勝」！

（now 632周六下午5時30分直播）

「紅魔鬼」亞洲之旅首站喺曼谷不敵泰國明星隊失威，大軍嗰場前線僅剩韋碧克攻堅，輸波後反撲力度不足。嚟到澳洲站曼聯有上季首席射手尹佩斯回歸，鋒線睇落升咗呢，雖然教頭莫耶斯捧到尹佩斯上天，但呢位荷蘭射手復操冇耐，不宜期望太高。曼聯始終缺少朗尼、查維亞靴南迪斯、艾舒利楊格及拿尼等進攻球員，選擇唔多，唔係話入就入。
曼聯試陣唔會搏盡

莫耶斯上場領軍首戰輸波，但只係一場帶有表演性質嘅熱身賽，並唔係聯賽或歐聯大戰，贏輸冇乜大不了，今戰性質都係冇分別，千祈唔好抱住追莫帥開齋嘅心態。「紅魔鬼」此行主要目的備戰新球季，莫耶斯順便睇吓新兵韋費特沙夏同小將贊奴薩等人啱唔啱使，後者上場負責側擊演出搶鏡，隨時有機會上位，班波唔齊腳兼冇態，戰鬥力一般。
米拿倒戈格外肉緊

澳職明星隊想搵迪比亞路、希斯基及小野伸二等大牌球星擔大旗，但佢哋全部唔畀面避戰。大軍由澳職名帥保斯迪高路領軍，前布力般流浪球星艾馬頓擔任隊長，冇乜星味，但實而不華，其中愛爾蘭中場米拿04至06年効力曼聯期間被上手教頭費格遜冷落，倒戈出戰實想砌低「紅魔鬼」，呢班波戰鬥力必在泰國明星隊之上，有力製造冷門賽果。