中國女足踢到殘益晒日本

猪拉多纳

同樣喺南韓舉行嘅東亞女子錦標賽，今日由「中日對決」展開序幕，日本女足對中國女足主W熱到得1.42倍都要捧。雖然日本女足主將澤穗希因傷冇入選，但教頭佐佐木則夫依然落柯打下令3連霸，相反中國女足球員因為全運會踢到殘，唔似搶到分。（now633及635台、中央5台及廣東體育周六下午3:15直播）
佐佐木則夫落柯打爭3連霸

坦白講，日本女足兩年前奪得女子世盃冠軍，火力都唔算特別強勁，澤穗希缺陣的確令人有啲避忌。不過咁，近年日本女足已徹底取代中國女足嘅亞洲領導地位，對賽5勝1和冇失波已經證明一切，連行事謹慎嘅教頭佐佐木則夫，賽前都忍唔住話要完成東亞錦標賽3連霸，可想而知佢哋對錦標志在必得。

另一方面，中國女足近年完全冇球員上到位，曾經被視為新希望嘅中場馬曉旭，近年因為受到傷患折磨完全冇料到，加上復出踢全運會嘅射手韓端因為狀態問題冇入選，隊長浦瑋已經33歲，隊中又有9個球員因為出戰全運會踢到殘，據講要帶傷歸隊，戰鬥力所餘無幾，淨係靠水原藍翼女足前鋒李影邊夠砌呀？