南北韓一團和氣

猪拉多纳

朝鮮搵未夠秤o靚妹孭飛

睇往績南韓女足遇着北韓，可以話冇得打，但係今日場女子東亞錦標賽「南北對決」，恐怕唔會再咁一面倒，事關北韓搵咗隊平均年齡得21.5歲嘅青年軍征戰首爾，呢場波開個2.95倍和出嚟一啲都唔奇。

（now633及635台周日下午5:15直播）
31人應援團 鄭大世父母有份

坦白講，北韓女足往績絕對贏晒南韓，齋由06年起計，雙方對陣6次，北韓係5勝1和未輸過。問題係北韓妹畀人查出服食禁藥，被褫奪2015年世盃參賽資格之後，集中火力備戰2016年里約熱內盧奧運，實行玩長線投資，所以今次造訪南韓班球員，以廿歲出頭為主，經驗極度不足。何況佢哋此行，係就係有在日朝鮮人總連合會組成一個31人應援團打氣，甚至連鄭大世父母都會撐場，不過又點比得上真係有地利嘅南韓女足吖。

南韓妹雖然都有個8年發展大計，家陣着重提拔班90後，但始終仲有一班80後骨幹支撐大局，連外流日職神戶INAC嘅10號仔池素妍，今次都有奉召歸隊，計埋經驗、地利同人和，同北韓女足只係五五波。
女子東亞賽賽制

賽事只設分組賽，不設淘汰賽階段，4隊進行單循環比賽，最高得分者為冠軍。如出現同分情況，將順序依據總球差、入球數目排名。若有2隊或以上依據上述準則仍未能分出排名，將按照所涉及球隊對賽得分、對賽球差及對賽入球數目排名；若僅涉及2隊，而該2隊在最後一輪賽事對壘，則於法定時間後互射12碼決定排名。