名古屋 阿仙奴合演入球騷

猪拉多纳

師徒過招好睇過戲

英超球隊熱身賽今晚又有直播睇，名古屋鯨魚喺豐田球場對45年來首次訪日嘅阿仙奴，入球大細中位數開到3.5球，都要捧2.1倍入球大。鯨魚教練史杜高域唔肯放射手約舒亞堅尼地踢東亞錦標賽，目的就係想同作為佢師傅嘅「兵工廠」領隊雲格過招，兩師徒應該會整場入球騷大家歎！

（亞視本港台周一晚6:30直播）
堅尼地留隊為鬥「兵工廠」

鯨魚今季非常唔掂，不過經過洲際國家盃休戰後，突然又好似醒番，對上4場有3勝1負，只係輸畀榜首嘅大宮松鼠。仲有呀，話晒鯨魚都係2010年日職冠軍，冇理由想好似印尼明星隊同越南咁任數，點都會希望入波威吓，而且鯨魚寧願畀澳洲國家隊鬧，都唔放中鋒約舒亞堅尼地踢東亞賽，證明佢哋唔希望吞蛋咁肉酸。

另一方面，阿仙奴教頭雲格曾經喺95年執教鯨魚，當時陣中王牌就係史杜高域，日前嘅記者會，兩師徒笑晒口互笠高帽，睇得出交情冇變，要知道「兵工廠」球員出名易傷，相信史杜高域會落柯打嗌球員就住，如果唔係，未開季就整傷師傅啲球員，就唔係咁好啦，咁樣對玩開控球在腳嘅阿仙奴好有利，入波唔難。
基奧特着火近2仗入5球

仲有要留意嘅係，「兵工廠」陣中嘅日本球員宮市亮，本身喺名古屋市嘅愛知縣出世，照計雲格會識做畀佢落場玩吓，到時宮市亮肯定會喺鄉里面前踢得更肉緊，增加開入球大嘅機會。咁當然啦，最近阿仙奴放風要買前鋒，激發基奧特梅開二度後又連中三元，既然佢要博表現保住正選位置，今場開入球騷機會自然好大，博得過o架！