「雌牛兵團」進步神速唔怕挪威

猪拉多纳

今晚女子歐洲國家盃8強將會有挪威惡鬥西班牙，雖然「雌牛」戰績遠不及男子國家隊，賽前更被視為冷門，但小妹相信呢支進步神速嘅球隊有力打破過去兩次對戰輸晒嘅紀錄保住不敗，一於直取1.65倍「讓客」啦！

（now633及635台周二凌晨0:00直播）
近10戰僅錄得1敗

只係第2次打入女子歐國盃決賽周嘅西班牙女足，世界排名雖然只係排18，比今仗嘅對手挪威低咗7名，但「雌牛軍團」近排戰績大躍進，最近10場賽事只係輸過1次咋！其實有咁好成績除咗前線火力夠穩定外，控球在腳嘅踢法可以頻頻製造入球機會，難怪近8場只得兩戰「食白果」，就算小組遇着上屆亞軍英格蘭都可攻入3球，今晚對住近8仗有6場都有失球嘅挪威，相信可以取得士哥。

踢法相當體力化嘅挪威，喺今屆分組賽雖然獲2勝1和嘅佳績，但就未見漂亮勝仗，贏嗰兩場最多只係1球險勝，即使擊敗衞冕冠軍德國，亦都係因為對手今屆表現非常不濟，面對近況唔錯嘅西班牙就未必可以輕鬆贏波晉級喇！

猪拉多纳