曼聯上番力水手大劑

猪拉多纳

曼聯亞洲之旅第3站去到日本，今日會火併日職球隊橫濱水手。紅魔鬼上仗5比1大炒澳職明星隊，其中新仔連格演出搶眼，韋碧克又開埋齋，連後備上陣嘅尹佩斯亦有士哥，仲有日本天王香川真司英格蘭國腳艾舒利楊格歸隊，火力之猛唔講得笑，適逢水手近期入得又失得，加上熱身賽贏輸唔重要，預計唔會刻意死守，令紅魔有望再演大屠殺，大盤不容錯過。

（now 632周二晚6時20分直播）
睇實連格 未來超新星

雖然首場熱身賽大意輸畀泰國明星隊，但曼聯畢竟係英超冠軍，上仗稍為出力就大勝澳職明星隊。以往執教愛華頓個陣，莫耶斯最擅長提拔新人，來到曼聯亦不改作風，好似贊奴薩同連格亦趁呢次難得機會，喺莫帥面前爭取表現，尤其係連格非常Sharp醒，上仗連省兩粒之餘，仲奉獻一次間接助攻，速度、射術瓣瓣有，又肯拚肯搏，隨時成為紅魔未來之星。

雖然上仗另一前鋒韋碧克亦梅開二度，但莫耶斯賽後坦言如果好運啲，韋碧克應該可以入多幾粒，咁講明顯係唔多滿意佢嘅表現，連未算托弗嘅尹佩斯後備入替都有士哥，韋碧克今仗必會加多兩錢肉緊，否則新季想爭正選都難，在人人爭功嘅情況下，曼聯有力再取一場大捷。
冇心理包袱 鬥攻可期

水手方面，齋藤學及粟原勇藏因入選日本隊踢東亞盃而無緣迎戰曼聯，儘管近期防線唔多穩陣，不過仲有巴西前鋒馬昆奴斯壓陣，佢連續3場有進帳，腳風甚順，加埋有中村俊輔後上支援，攻力唔曳，熱身賽冇乜心理包袱下，一於有前冇後打死罷就。既然雙方全民皆攻，斯維認為入球大係最佳選擇。