日本土炮讓唔起澳洲

猪拉多纳

東亞錦標賽日本男女足今日分途出擊，先講「男子組」日本迎戰澳洲，賽事喺南韓舉行，地理位置上，日本佔有「半個主場之利」，不過領隊沙哲朗尼今次冇徵召「海外兵團」入伍，實力不宜高估，尤其係防線問題仍然未有改善，遇上身材魁梧、衝刺力強嘅澳洲球員，勢必面臨更大壓力。日本讓波，寧捧澳洲「讓球客勝」。

（now 633及635周四晚7時直播）

睇到日本大軍名單，真係唔開胃，只有後衞駒野友一屬於常規國腳，其餘大部分球員極少入選，甚至之前未試過上陣。日本上仗鬥中國隊，就即刻露餡，開波僅4分鐘已被攻破大門，最離譜係最後10分鐘連失兩球，被逼和3比3，表現非常狼狽。事實上，日本近年後防人才凋零，上月洲際國家盃三仗共失九球，防線紙咁薄，更何況現時派「B隊」出戰，情況更加惡劣。

至於澳洲亦以本土聯賽球員為骨幹，但澳職近年引入唔少球星，水準亦日漸上升，絕對唔可以睇小，上仗對東道主南韓，亦力保不敗。澳洲球員身體質素佳，可謂硬橋硬馬，正好剋住踢法較柔嘅日本。雙方近六次對賽，澳洲取得一勝五和，受讓抵玩。

女足質優可輕取北韓
「女子組」日本女足對北韓女足，日本兩年前奪得女子世界盃冠軍，而且國內女子賽事愈來愈受歡迎，為國家隊提供唔少優秀新血，應可輕取北韓女足。

（now 633及635周四下午4時15分直播）