車路士「-3」照炒印星

猪拉多纳

中前場二線兵搏命爭上位
嚟到季前亞洲之旅最後一站雅加達嘅車路士，今晚會同主場嘅印尼明星隊火併，上場炒完馬來西亞明星隊嘅佢哋，明顯已經上力，最緊要係車仔今季中前場正選位競爭激烈，今晚獲委任擔正嘅丹巴巴亞，以及新兵舒賀爾尼等，落到場肯定唔會肯留手，要炒有成半隊係U23成員嘅印尼明星隊自然話咁易，讓三球力奇照捧1.72倍「讓客」！（亞視國際台周四晚9:30直播）

丹巴巴亞頂替盧卡古擔正
車仔今次亞洲行首站對泰國明星隊小勝1:0，到上仗第2站對住馬來西亞明星隊已經輕鬆大炒4:1。雖然班波仲有包括費蘭度托利斯、桑馬達、大衞雷斯等6個踢完洲際國家盃成員未歸隊，不過隊波依然星光熠熠，淨係泰利、伊雲洛域同夏薩特等都夠晒孭飛，加埋前線又爆出個回收嘅「小魔獸」盧卡古，要贏波根本全無難度。

講起盧卡古，連續兩場熱身賽都有波入嘅佢，成功喺回巢主帥莫連奴身上留低好印象，「寸王」日前就話新季應該唔會再將佢外借，認為佢甚至有力同費托爭正選，再加上上仗入完波整傷膝頭，已經飛返英國嘅小將奇雲迪布尼，以及塞內加爾射手丹巴巴亞，最終邊個擔正都有排爭。莫帥話明今仗輪到丹巴巴亞打正選，今勻落到場仲唔係搶錢咁踢？至於由利華古遜加盟嘅德國國腳舒賀爾尼，又話要爭取正選確保入選明年德國世盃大軍，難得依家中場線未齊人，佢同域陀摩西斯呢啲邊緣球員，梗會格外搏命啦！

「印星」半隊係U23成員
「印星」呢邊，接連招呼完兩支英超球隊，月中先狂吞阿仙奴7蛋，上周末表現有改善僅輸畀利物浦0:2，不過今晚對住「藍戰士」真係咪寄望太多。一來車仔實力應該係紅軍之上，二來係佢哋上周日公布最新22人大軍名單，發現有4名主力因唔同理由冇再入選，最恐怖係依家成班波原來有一半係印尼嘅U23成員，講真，就算出大國腳都未必頂得住車仔，更何況佢哋？