熱刺磨利刀 搵南華報仇

猪拉多纳

4年前訪港淨吞南華雙蛋嘅熱刺，今晚喺季軍戰再次碰頭，為報仇雪恨肯定唔會留手，主帥保亞斯更暗示會加強鋒力求勝！主隊南華教練張寶春則表明會繼續穩中求勝，不過要頂住熱刺恐怕有心無力。

（now 621及632周六晚6時直播）

熱刺09年為慶祝南華足球隊百周年紀念訪港與「少林寺」踢表演賽，結果南華憑陳肇麒與李海強各建一功爆冷贏2比0。雖然保亞斯喺賽前記者會強調唔會抱着復仇心態落場，但「人要面、樹要皮」，唔通熱刺會肯再次喺失威咩？

火力超強點變都得
上場熱刺以「442」陣式出戰新特蘭，保帥話明陣內球員適應力強，可以因應唔同對手踢唔同陣式，相信熱刺今晚面對實力遜一籌嘅南華，必會變陣加強鋒力。事實上，熱刺如迪科爾、艾迪巴約、迪比利同艾朗連儂都是速度技術兼備，就算加里夫巴利因傷缺陣都冇有怕。至於防線雖有維頓漢喺初賽受傷，今場肯定缺陣，但面對一心防守南華應綽綽有餘。

被指死守 張寶春黑面
另一邊廂，南華首戰踢出部署，憑出色防守僅負曼城0比1，而喺尋日賽前記者會上，南華新帥張寶春面對記者有關南華死守踢悶波嘅指責，即時面色一沉回應：「我哋梗係明白球迷要求，但作為一支職業球隊，有職業作戰嘅模式，唔可以盲目進攻。」陪同佢出席記招嘅前曼城青年軍謝家強其後再「補鑊」話，多謝球迷喺初賽嘅支持，話希望南華Fans可以喺今晚季軍戰繼續為佢哋打氣。