士氣爆燈唔怕北韓 中女為錢途勇不可擋

猪拉多纳

女子東亞錦標賽今日煞科，北韓女足喺首爾對中國女足，未必開到W。雖然中國女足有射手李影重傷肯定缺陣，不過佢哋已經打出士氣，連續兩場有球員抽筋都冇放棄搶分，況且又要為吸引贊助而戰，1.85倍「讓球客勝」跟得過。（now633台、635台、廣東體育及中央5台周六下午4:15直播）

足協副主席請食韓燒慶功
北韓女足日前以0:0打和女子世盃冠軍日本女足，1勝1和仲有機會爭標，比賽期間仲有前鋒李藝景欠運射中楣，證明隊波實力並唔嘢小，不過今場足智彩開佢哋W有1.83倍，似乎熱唔透。另一方面，中國女足日前以2:1險勝南韓女足，因為部分球員出戰全運會後趕住歸隊，休息唔夠，連續兩場有球員抽筋，不過正好證明，暫時1勝1負嘅中國女足唔肯輕易衰畀人睇。

當然，前鋒李影上場帶傷落場後備入替建功後，拉傷韌帶收工，今場唔會上陣，肯定會拖低中國女足火力，昔日王牌馬曉旭唔夠狀態打正選，同樣好大影響，不過中國女足砌低南韓女足後，得到足協副主席于洪臣請食韓國燒烤慶功，加上教頭郝偉大爆，部分成員每個月收入得800蚊人民幣，講明希望「鏗鏘玫瑰」打出成績吸引大企業贊助，信佢要捧1.85倍「讓球客勝」。

女子東亞賽賽制
賽事只設4隊單循環比賽，最高得分者為冠軍。如出現同分情況，將順序依據總球差、入球數目排名。若有2隊或以上依據上述準則仍未能分出排名，將按照所涉及球隊對賽得分、對賽球差及對賽入球數目排名；若僅涉及2隊，而該2隊在最後一輪賽事對壘，則於法定時間後互射12碼決定名次。