國足不敗奪亞軍球迷由鬧變讚

猪拉多纳

日本2:1絕殺南韓首度捧盃
東亞錦標賽昨日煞科，中國於頭場以4:3砌低澳洲，雖然最終得5分衞冕失敗，但國足大打爭氣波，以不敗姿態贏得亞軍，令唔少球迷由鬧變讚舉牌支持。至於日本就以2:1險勝東道主南韓，柿谷曜一朗完場前補射絕殺成功，協助國家隊以2勝1和首次奪得東亞錦標賽冠軍。

「視象教學」奏效 4:3挫澳洲
國足以4:3擊敗澳洲嘅比賽，由于大寶、孫可、楊旭同武磊分別入波險勝，近年被傳媒形容為13億人民恥辱嘅國足，更重獲球迷信任，球場有人舉牌「你不放棄，我怎能拋棄」作出支持。國內傳媒仲大爆，今次國足省招牌，係因為看守教練傅博採用「視象教學」，不斷逼球員睇巴塞隆拿嘅比賽錄像，建立佢哋嘅信心，仲有網友話，傳博激起民族正能量添！

日韓大戰氣氛緊張，上半場25分鐘，柿谷曜一朗突破越位單刀射入為日本打開紀錄。8分鐘後，尹日洛禁區外起腳彎入楣底入網，為南韓扳平返更衣室。換邊後雙方入肉攻勢唔多，到完場前，柿谷曜一朗近門補射得手絕殺南韓，首次入選國家隊就做捧盃英雄。