燕豪芬弗爆華麗登場

猪拉多纳

歐聯第三圈外圍賽首回合不乏名牌球隊，荷甲勁旅燕豪芬粉墨登場，主場對比利時球隊華雷根。燕豪芬今季提升名宿高古擔正執教，呢位前巴塞隆拿中場曾於西甲浸淫多年，盡得進攻足球精髓，坐正帥位首度出戰大賽，梗係要做齣好戲，今仗炒得起第一次參與歐聯嘅華雷根，捧「讓球主勝」。

（周三凌晨2時45分開賽）

相信大家對高古絕對唔陌生，呢位42歲少帥球員時代喺燕豪芬成名，其後効力巴塞6年，5年前掛靴後，即喺燕豪芬及荷蘭國家隊任助教。佢前季曾短暫做燕豪芬嘅看守教練，就帶領球隊奪得荷蘭盃冠軍，腳頭非常好，難怪上季結束後艾禾卡特離隊，會方即提拔高古坐正。燕豪芬喺高古率領下，備戰工作非常順利，熱身賽曾淨勝漢諾威、費倫巴治兩球或以上。球隊日前成功邀請朴智星回巢，雖然呢位前南韓國腳未能趕及今場上陣，但相信亦有助提升士氣。

新丁華雷根當交學費
另一邊廂，華雷根上季爆冷奪比甲亞軍，令唔少球迷大跌眼鏡。呢支比利時新貴12年前仲喺丙組打滾，參加歐洲賽次數寥寥可數，最威都係06至07年球季打入足協盃（歐霸盃前身）32強。呢類異軍表現往往曇花一現，遇上歐聯常客燕豪芬，恐怕冇運行。

歐聯去到邊
現階段為歐聯外圍賽第三圈賽事，除咗之前兩圈晉級球隊，今圈仲加入聯賽冠軍隊巴素利、奧地利維也納、尼科西亞，及非聯賽冠軍隊里昂、辛尼特、燕豪芬、米達列斯、PAOK、華雷根、洛斯查蘭特、費倫巴治、草蜢及薩爾斯堡。至於今圈出線嘅十五隊，將會進入歐聯外圍賽附加賽，再與五支非聯賽冠軍隊阿仙奴、皇家蘇斯達、史浩克04、AC米蘭及費利拿，爭逐殺入歐聯分組賽三十二強嘅最後十個席位。