唔怕倒戈腦殘 曼城捧完盃再攞「A」

猪拉多纳

邊緣人爭位搏甩髀
上個禮拜先喺香港揚威巴克萊亞洲錦標賽嘅曼城，今晚去到拜仁主場轉戰奧迪盃同AC米蘭交手。呢支「億萬大軍」經歷完南非同香港之行應該逐漸上力，加上尼史葛、巴利同迪斯高3位邊緣球星趕住交貨證身價，即使面對舊隊友巴洛迪利都冇面畀，1.93倍主勝信得過。

（有線61、64、201、203及廣東體育周四凌晨0:15直播）

為期兩日嘅奧迪盃今晚展開，首次獲邀參賽嘅曼城會同AC米蘭、聖保羅及主人家拜仁角逐殊榮，話就話係季前熱身賽，之不過曼城戰將為前途着想，梗係要把握機會取悅新帥比歷連尼啦！好似尼史葛咁，佢將會取代喺香港整傷足踝要抖3星期嘅拿斯達錫擔正，中場巴利同喺巴克萊亞洲錦標賽決賽射失12碼嘅前鋒迪斯高，新季位置亦都危危乎，呢三位仁兄為免冇碇企，奧迪盃都當決賽咁踢啦！

阿里基認球員未操起
再講，新兵尼格度同迪斯高經過喺香港嘅磨合，照計開始擦出火花，配合埋極速翼鋒捷西斯拿華斯嘅沉底出波，前面兩碌大杉仲唔如魚得水？今場波嘅焦點，唔使問都係倒戈相向嘅AC前鋒巴洛迪利，不過今仗係「腦殘」今季首場熱身賽，教練阿里基坦言佢同艾沙拉維都未上力，要撕破有赫特同高柏尼鎮守嘅曼城後防唔易喎！

「紅黑兵團」啱啱喺國際冠軍盃贏華倫西亞2:1，阿里基話球員體能喺比賽末段跌晒Watt，一眾手足擺到明未操起，最大鑊係前鋒羅賓奴同後衞邦利拿都喺呢場波傷出，當中邦利拿證實右膝蓋骨骨折要抖3個月，拉傷左腳大腿嘅羅賓奴亦要休戰兩個禮拜觀察傷勢，另一射手柏仙尼又話養緊傷，咁鬼多隱憂，唔係唔捧曼城呀？

奧迪盃賽制
合共4隊參賽，準決賽若法定時間內打和，即以互射12碼決勝。勝方將躋身決賽，負方則轉戰第三、四名次賽。