莫連奴開車倒米

猪拉多纳

今日的我打倒昨日的我
國際冠軍盃首圈第3場賽事，英超車路士及意甲國際米蘭將喺美國印第安納波利斯奧爾球場進行表演賽。今場焦點並唔係新球員，而係車路士領隊莫連奴。「寸王」曾經帶領國際米蘭成為意甲歷史上首支3冠王者，上至老闆莫拉堤下至器材助理佢都認識。正所謂知己知彼，百戰百勝。莫帥比起國米新帥馬沙利更了解國米，故今仗有望上演一幕「今日的我打倒昨日的我」好戲，主W必揀。

（now 632周五早上8時直播）

舊部過料熟晒敵情
莫連奴與國際米蘭球員感情非比尋常，如因傷缺陣嘅隊長辛尼迪、中場甘比亞素、前鋒迪亞高米列圖等舊將，唔單止同莫帥friend到攬頭攬頸，平時仲會互通電話兼開餐敍舊添！所以話國際米蘭有任何重大變動，莫連奴都會從舊部屬口中得知。若論對國際米蘭嘅了解程度，莫連奴可能比起新帥馬沙利更勝一籌。提到馬沙利，以前佢執教森多利亞同拿玻里嗰陣已經同莫連奴交過手，莫連奴親眼見證馬沙利如何上位，亦早就摸清晒佢個底。莫連奴喺乜都識乜都知嘅優勢下，當然有利喺呢場熱身賽爭勝。

陣容方面，車仔可謂人腳鼎盛，陣中星光熠熠，後備力量充裕；反觀國米近年不斷縮皮，陣中冇星級戰將壓陣，已無復3冠王年代之勇，遇上當弗嘅車路士實難以招架。

亞洲之旅操到弗晒
再講兩軍嘅備戰工作，車路士確比國米更勝一籌。國米只係踢過4場熱身賽，稍有實力就只得維琴察同德甲漢堡。相反車路士一完咗英超球季就去美國同曼城鍊咗兩場，跟住又同泰國、馬來西亞及印尼3地嘅明星隊切磋，而錄得3戰全勝轟入13球嘅佳績，球員經過連場作戰，狀態一定唔差，加上亞洲熱身賽前，大軍已經嚟過美國一趟比賽同做宣傳，對於當地環境嘅適應程度一定好過國米，因此今場睇好主W好正路。

值得一提，今場打和就以互射12碼決定勝負，勝方下一場將會對AC米蘭。

國米獎盃櫃 2008-2010
意甲：2009,10

意大利盃：2010

歐聯：2010

車仔獎盃櫃 2004-07,2013-
英超：2005,06

足總盃：2007

聯賽盃：2005,07