魯賓卡山超班過蘭關

猪拉多纳

今晚上演多場歐霸盃第三圈外圍賽首回合，呢項賽事雖然被視為「二奶盃」，但二三線聯賽球隊仍然對佢趨之若鶩，尤其俄羅斯兵團近年崛起，一直渴望揚威歐洲賽場，爭標鬥心比唔少名牌勁旅更高。阿King今次睇好魯賓卡山，呢支俄超勁旅上屆勇闖8強，僅被後來冠軍車路士淘汰，實力絕對唔嘢小，今仗作客丹麥嘅蘭達斯，客W1.68倍穩陣，屬於過關必然之選。

（周五凌晨零時30分開賽）

蘭達斯丹麥「散仔」冇作為
俄羅斯球壇近年投入巨額金錢發展，令聯賽及球隊水準大為提升，辛尼特、莫斯科中央陸軍都曾喺近屆歐霸盃奪冠。魯賓卡山上屆亦打入8強，最終兩回合僅以4比5不敵車仔，可見球隊屬於爭標分子。以魯賓卡山嘅級數，喺現階段可謂超班，要晉級唔成問題。蘭達斯過去僅3次出戰歐霸盃（包含前身歐洲足協盃），最近嗰次已係10/11年球季，而且第三圈就出局，只屬陪跑分子。蘭達斯今季丹麥聯賽兩戰未贏過，去到歐洲賽事，更難有作為。

另一場，連續喺06及07年奪得歐洲足協盃冠軍嘅西維爾，出售兩位進攻主將尼格度及捷西斯拿華斯畀曼城，鋒線實力大減，恐怕主場都炒唔起黑山球隊FK馬拿度斯，大細中位數調升至3.5，要入球細。盧森堡球隊迪費丹治上圈爆冷淘汰荷甲球隊烏德勒支，作客一役更轟入對手3球，愈踢愈有信心，今仗作客挪超球隊特林素，隨時再演入球騷，捧大盤。