拿玻里佔盡仙機

猪拉多纳

大肆擴軍 砌出豪華靚陣
去年因遷就倫敦奧運而停辦一屆，由英超阿仙奴主辦嘅酋長盃又嚟喇！今晚主場出擊嘅兵工廠將迎戰大肆擴軍嘅意甲拿玻里，而賽制一如以往，除贏波3分和波1分之外，入1球都有1分，總之入得愈多奪標機會愈大。今個夏季意甲拿玻里嘅見報率認真高，無論教練及球員都有重大變動，球會作出多個重量級收購後，實力肯定大升呢，反觀阿仙奴增兵至今得個講字，面對煥然一新嘅拿玻里，主場未必有着數，捧客W好過。

（now 635及621周六晚11時20分直播）

肥賓揸大旗 購皇馬3星
拿玻里今季請來前利物浦領隊賓尼迪斯執教，球迷都對呢位西班牙人拍手叫好。查實賓尼迪斯曾承認深受一代名帥沙基所影響，執教風格偏向意式，相信拿玻里球員會更易受落。唔好忘記肥賓曾執教過國際米蘭，有過意甲經驗對佢帶領拿玻里爭好成績自然大有幫助。

更加令人憧憬係3名來自皇馬嘅猛將包括希古恩、荷西卡利祖以及艾比奧爾於暑期齊齊來到那不勒斯，佢哋同肥賓同聲同氣，話唔定喺拿玻里發威。其他新援如燕豪芬翼鋒梅頓斯及借用門將連拿，亦可為拿玻里帶來朝氣同新鮮感。所以話出售王牌射手卡雲尼對於球隊未必係壞事，因為正因為高價賣咗佢，先至有財力喺多個位置增兵，構建一個耳目一新嘅豪華陣容。

反觀阿仙奴領隊雲格最叻開空頭支票，又話攞冠軍又話買勁人，但次次都係吹水唔抹嘴。就好似今場嘅主角之一希古恩，阿仙奴其實早早將佢列為收購目標，但後來竟然因為喺轉會費方面計埋啲「婆乸數」，結果最終畀拿玻里搶人成功，痛失良將。

兵工廠孤寒 爭輸希古恩
而最近表示會全力爭烏拉圭射手蘇亞雷斯過檔，但傾到就嚟開咧都未有下文。阿仙奴欠缺新元素刺激，以現有班底好難有大突破，今場要贏拿玻里唔係咁易。

加上球隊較早前飛咗去亞洲搵真銀，球員連飛幾個國家兼比賽，體力點都要打多少折扣，疲兵出戰下，更有利於拿玻里爭勝。

拿玻里新季人腳變動：In
希古恩 （前鋒） 來自皇家馬德里

荷西卡利祖 （前鋒） 來自皇家馬德里

艾比奧爾 （後衞） 來自皇家馬德里

連拿 （門將） 來自利物浦

梅頓斯 （中場） 來自燕豪芬

Out
卡雲尼 （前鋒） 轉投巴黎聖日耳門

迪沙迪斯 （門將） 轉投羅馬

甘柏拿路 （後衞） 轉投國際米蘭