新帥效應繼續發功 國米唔赦華倫

猪拉多纳

同日另一場國際冠軍盃負方名次戰，由西甲華倫西亞鬥意甲國際米蘭，後者今季由前拿玻里教練馬沙利領軍，新人事新作風下，上賽鬥車路士不落下風，估計新帥效應可以持續；對手華倫西亞剛啱將王牌蘇爾達杜賣咗畀熱刺，成隊波冇厘神氣，讓唔起國米，要「讓球客勝」！

（now 632及621周一凌晨4時直播）

國米上季僅以第9名衝過終點，四大皆空曳到唔恨，老細莫拉堤當然即刻換帥，拿玻里意籍教頭馬沙利成新教頭。拿仁唔敢講馬沙利能令國米即刻起死回生，但起碼於執教初期，班球員必定落力爭取表現，上仗對車路士國米一開波就狂攻，全場不斷製造埋門機會，雖然最後輸波，但實際表現惹人好感，雖敗不辱，相信今場會將上賽輸波嘅怨氣，發洩喺華倫身上。

賣蘇爾達杜 打沉士氣
華倫西亞近年不斷受財困影響，最近將大將蘇爾達杜賣畀熱刺，雖然陣內球員都見怪不怪，但心裏肯定唔好過，肯定會影響作戰心情。事實上「蝙蝠兵團」季前熱身賽踢得好曳，接連不敵卡爾斯魯厄、史特加同AC米蘭，狀態差士氣曳，讓波捧對家。