AC車仔互片 踩油「大」鬥法

猪拉多纳

紅黑兵喪失波 藍戰士爭位踢
國際冠軍盃第2輪賽事聽朝上演重量級「大」戰，AC米蘭喺美國新澤西對車路士，贏波嗰隊就入決賽，兩隊為名為利唔會留手，當然係玩1.7倍入球大着數。特別係消息話朗尼上「車」已進入倒數階段，相信車仔班進攻球員聽到，都會踩盡油騷哥利，唔憂冇波入！（now621及632台周一早上6:30直播）

AC慘負曼城認衰仔
AC米蘭喺奧迪盃以3:5慘負曼城，半場連失5球簡直係恥辱烙印，賽後教練阿里基更認衰仔，承認現階段根本唔夠曼城砌，聽到都令人唏噓。不過嗌得大家玩入球大，紅黑兵團有幾墮落你咪理，反正艾沙拉維對曼城入到兩粒，又有報道話巴洛迪利會歸隊，可能落場同車仔玩吓，如果係真嘅1.7倍入球大就更穩陣。

雖然AC喺奧迪盃季軍戰，只以1:0贏聖保羅，但其實佢哋收埋好多主力，擺明要同車仔死過，就算羅賓奴傷咗都唔怕。另一方面，車仔現時有3個中鋒踢得，費蘭度托利斯、丹巴巴亞同盧卡古都識入波，之不過領隊莫連奴恨簽朗尼恨到出面，假如成事，車仔前線位置競爭肯定更激，邊個再唔嚟料就好危險。

車仔試陣狂換人
「藍戰士」肯入波，當然有利開入球大，但其實佢哋唔似守得住，先至係嗌大家揀入球大主要原因。事關睇番最近嘅熱身賽，莫連奴只係當打機咁隨便試陣，通常下半場就會瘋狂換人，咁玩法想守得住真係唔易，話晒馬來西亞明星隊同印尼明星隊，對住佢哋都入到1粒，國米入唔到先至淨吞兩蛋，照計「紅黑兵團」唔會一樣咁渣啩？