辛尼特飲得杯洛

猪拉多纳

沙皇回歸踢爭氣波
今晚續演七場歐聯第三圈外圍賽次回合賽事，其中俄羅斯班霸辛尼特主場硬撼丹麥球隊洛斯查蘭特，辛尼特首回合只係贏一粒，出線未穩陣，今返主場必加多兩錢肉緊，上季在阿仙奴長坐冷板嘅「沙皇」艾沙維，今夏回歸辛尼特誓要踢爭氣波，洛斯查蘭特近況曳爆作客等炒，「讓球主勝」值博。

（周四凌晨零時開賽）

貴為俄超班霸，辛尼特唔甘心淨係做山寨王，希望喺歐聯有一番作為，不過巴西前鋒侯克同球隊格格不入，之前又因人工高兼冇料到，惹來一眾俄國國腳眼紅，好彩今夏迎來老將艾沙維回巢，「沙皇」曾表示上季在阿仙奴長居後備，幾乎搞到抑鬱症，因此非常珍惜今次重返母會嘅機會，決心一洗頹風，特別係佢同箭頭基沙哥夫在國家隊夾慣夾熟，默契十足，效果一定好過拍住侯克，加埋上輪聯賽連中三元嘅葡萄牙中場丹尼艾維斯，火力勁到爆燈。

洛斯查蘭特作客捱打
辛尼特在首回合作客洛斯查蘭特險勝1比0，出線仲未穩陣，為求盡快鎖定出線資格，今仗返主場一定搶攻。雖然洛斯查蘭特上季曾殺入歐聯分組賽，但結果六仗全敗失廿二粒慘淡收場，明顯未夠班，今季開咧更淪為尾二，質態皆曳之下，作客對住求勝心切嘅辛尼特，難逃大敗厄運，「讓球主勝」捧得過。

另一場次回合賽事，荷蘭勁旅燕豪芬造訪比利時對華雷根，首回合華雷根慘吞兩蛋，由於其主場唔符合歐聯比賽要求，今仗被迫移師到布魯塞爾史杜克球場舉行，變相冇埋地利，更難收復失地，而燕豪芬喺荷蘭名宿高古掌舵後持續復甦，不妨博佢哋贏多鋪。