史雲斯領先4粒 作客讓波難靠

猪拉多纳

馬模+1攞尾彩

今晚上演歐霸盃第三圈外圍賽次回合，英超代表史雲斯作客面對瑞典大軍馬模。史雲斯今夏簽入人氣前鋒韋菲特邦尼，拍住米捷組成恐怖鋒線，首回合大炒馬模4比0已見威力。不過史雲斯今季兼顧多條戰線，領隊米高盧特立必會留有一手，相信今戰唔會去盡，讓波信唔過，博「讓球主勝」！

（周五凌晨1時45分開賽）

為應付歐霸盃戰線，史雲斯積極招兵買馬，成功搶得維迪斯王牌前鋒韋菲特邦尼，呢個科特迪瓦射手不嬲高效，首回合對馬模貢獻兩個士哥，拍住史雲斯首席士哥拿米捷威力超強。與此同時，大軍引入利物浦中場舒維爾，戰鬥力全面提升，預期新季會有一番作為。

不過，史雲斯家陣有四球喺手，冇必要趕絕對手，今戰隨時只當係一般熱身賽打，分分鐘派啲副選練兵。馬模主場出戰誓要挽回面子，鬥志鮮明可秤先。
維迪斯Ｗ熱唔透咪中伏

同日荷甲大軍維迪斯主場對羅馬尼亞球隊比杜路爾，主隊今夏流失唔少主力，包括射手韋菲特邦尼及中場雲堅基爾，戰力大打折扣，相信需要時間慢慢調整。維迪斯首回合作客同對手打成1比1，只憑箭頭莊拿芬里斯射入12碼，踢嚟冇乜料到，今次回師主場出戰，主勝有1.92倍，實在好分得滯，睇嚟唔似贏得，可博「讓球客勝」。（周五凌晨2時開賽）